Малады брамнік пасля сезона ў «Дынама» Мінск прыехаў у клуб НХЛ: там шмат канкурэнтаў, але сітуацыя не безнадзейная

У нядзелю раніцай Аляксей Коласаў прыбыў у Філадэльфію. За акіян 22-гадовы беларускі галкіпер, які сезон-2023/24 правёў у мінскім «Дынама», дабіраўся праз Стамбул – пералёт з Турцыі заняў дзесяць з паловай гадзін. Коласаў разам са сваім агентам Алешам Пілкам адправіўся на базу «Філадэльфіі» і пабываў у каманднай распранальні, зрабіўшы там фота на памяць.

Коласаў мог прыляцець яшчэ раней, калі б не цяжкасці з атрыманнем працоўнай візы ў ЗША. Яе брамнік разлічваў атрымаць яшчэ ў мінулы аўторак, але спроба скончылася няўдачай. Пра праблему ведалі ў «Філадэльфіі», з якой у Коласава дзейны кантракт на тры гады. Генеральны менеджар «Флаерз» Даніэль Брыер расказваў пра тое, чаму беларус затрымаўся, устрымліваючыся ад прагнозаў – маўляў, рашэнне па візе ўжо не раз адкладалася. Памочнік Брыера Брэнт Флар дадаваў, што Коласава вельмі чакаюць у клубе, калі б той не прыляцеў.

Наведванне распранальні «Флаерз» не азначае, што Коласаў адразу стане гульцом НХЛ. Чакаецца, што першыя дні за акіянам беларус прабудзе з першай камандай, а пасля адправіцца ў фарм з АХЛ. Заход у «Ліхай Вэлі» прадказваў галкіперу і Брыер.

Коласаў можа паспець згуляць у АХЛ яшчэ ў гэтым сезоне – матчы рэгуляркі працягнуцца да 22 красавіка. «Ліхай Вэлі» ў Атлантычным дывізіёне ідзе шостым – гэты радок прахадны ў першы раўнд Кубка Колдара. У каманды наперадзе яшчэ як мінімум дзевяць гульняў. Мясцовыя журналісты пішуць, што да выхаду на лёд Коласаў павінен быць гатовы ўжо да канца гэтага тыдня. Але і ў АХЛ беларусу давядзецца вельмі пастарацца, каб гэтай вясной пасля чатырох кахаэлаўскіх сезонаў дэбютаваць за акіянам. Хай «Флаерз» не першы сезон адчуваюць праблемы з брамнікамі, аднак канкурэнты ў Коласава нават у АХЛ вельмі сурʼёзныя.

У свежым матчы супраць «Уілкс-Бэры» (3:4 АТ) вароты каманды абараняў 27-гадовы швед Фелікс Сандстрэм, якога на днях даслалі з «Філадэльфіі». У сезоне-2023/24 скандынаў правёў пяць матчаў у НХЛ (адбіў 82,3% кідкоў) і 21 матч у АХЛ (адбіў 88,2% кідкоў – 71-ы паказнік па лізе). Усяго на рахунку Сандстрэма 30 гульняў за «Флаерз». У юнацтве кіпер лічыўся перспектыўным і гуляў за малодшыя зборныя Швецыі. У 2015-м Сандстрэма пад 70-м пікам задрафтавала «Філадэльфія», а праз два гады ён узяў срэбра моладзевага ЧС і статуэтку найлепшага галкіпера турніру.

Сандстрэм па-ранейшаму знаходзіцца на кантракце пачаткоўца – у НХЛ ён зарабляе 775 тысяч долараў штогод. Праўда, пагадненне заканчваецца пасля гэтага сезона. Паказнікі брамніка намякаюць, што новы кантракт яму наўрад ці прапануюць, таму, магчыма, давядзецца стаць абмежавана свабодным агентам. Для параўнання, калі Коласаву ўдасца прабіцца ў НХЛ, то ён будзе атрымліваць 925 тысяч долараў за сезон. У АХЛ аклад беларуса падае да 80 тысяч долараў.

Са шведам у варотах «Ліхай Вэлі» канкуруе 29-гадовы Кэл Петэрсан. «Бафала» задрафтаваў амерыканца пад 129-м нумарам у 2013-м. Сусветную вядомасць Петэрсан атрымаў не дзякуючы сваім 107 матчам у НХЛ, а пасля ЧС-2021. Тады ЗША ўзялі бронзу, а самога Петэрсана прызналі найлепшым брамнікам турніру. У гэтым сезоне ён таксама правёў пяць матчаў за «Флаерз» (адбіў 86,4%), але асноўную практыку атрымлівае таксама ў АХЛ, дзе ў яго 24 сустрэчы (адбіў 89,4% – 18-ы паказнік па лізе).

Сёння Петэрсан – праблемны актыў для «Філадэльфіі». У брамніка тлусты энхаэлаўскі кантракт на 5 мільёнаў долараў штогод. За непераканаўчую гульню ў варотах «Флаерз» яго не толькі адпраўлялі ў АХЛ, але і выстаўлялі на драфт адмоў, дзе ніхто не падхапіў галкіпера. Са спускам у «Ліхай Вэлі» Петэрсана клуб паралельна разгрузіў зарплатную ведамасць на 1,15 мільёна долараў.

І гэта не ўсе канкурэнты Коласава ў АХЛ. Пад беларуса спецыяльна расчысцілі месца трэцяга брамніка, адправіўшы з «Ліхай Вэлі» ў ECHL Паркера Гахагена. Амерыканец у свае 30 паспеў правесці толькі 30 матчаў у АХЛ.

Калі Сандстрэма і Петэрсана «Філадэльфія» спусціла ў фарм праз узровень гульні, то з Картарам Хартам зусім іншая гісторыя: у студзені 2023-га асноўнаму галкіперу калектыва прадʼявілі абвінавачванні ў сэксуальным дамаганні – у 25 гадоў яму пагражае да 25 гадоў пазбаўлення волі. Канадзец не можа гуляць у НХЛ да завяршэння судовага разбору, што азначае для яго датэрміновае заканчэнне сезона. 4-мільённая дамова з Хартам падыходзіць да канца, а ў «Філадэльфіі» не гараць жаданнем працягваць супрацу. Цяпер ходзяць чуткі, што Харт можа збегчы ў КХЛ, дзе ім нібыта цікавіцца «Ак Барс».

А вось на днях з Расіі пасля таго, як ЦСКА (Масква) вылецеў у другім раўндзе Кубка Гагарына, прыехаў 27-гадовы брамнік Іван Фядотаў. Летам 2022-га за ягоным лёсам многія сачылі. Тады ў Фядотава скончыўся кантракт з ЦСКА і ён падпісаў гадавую дамову з «Філадэльфіяй», якая задрафтавала хакеіста яшчэ ў 2015-м пад 188-м пікам. Пасля гэтага галкіпера затрымалі супрацоўнікі ваенкамата і адправілі на год служыць на Паўночны флот. Вярнуўшыся з войска, Фядотаў працягнуў карʼеру ў ЦСКА, але брамнікам па-ранейшаму цікавілася «Філадэльфія». Расіянін прыляцеў за акіян на два дні раней за Коласава, і адразу пачаў трэнінгі з «Флаерз» – і ўжо патрапіў у заяўку на матч НХЛ. Інсайдары паведамляюць, што кіраўніцтва клуба ўжо пачало абмеркаванне з галкіперам новага 2-гадовага кантракту. На сёння пагадненне Фядотава па зарплаце роўна таму, што мае на руках Коласаў. Пры гэтым на ўзроўні КХЛ расіянін выглядаў не нашмат лепей: у рэгулярцы-2023/24 Фядотаў, які дэмабілізаваўся, браў 91,4% кідкоў і прапускаў 2,37 шайбы за матч, а маладзейшы Коласаў меў паказнікі 90,7% і 2,39.

Пакуль жа першы нумар «Філадэльфіі» 24-гадовы Самуэль Эрсан. Швед праводзіць першы паўнацэнны сезон у НХЛ і пакуль не ззяе. У гэтай рэгулярцы ён адбівае 89,2% кідкоў, а гэта 67-ы паказнік па лізе. На сёння «Флаерз» змагаецца за плэй-оф, ідучы на восьмым месцы ва Усходняй канферэнцыі. Пачынаць барацьбу ў Кубку Стэнлі з такім галкіперам для каманды будзе даволі рызыкоўна, таму кіраўніцтва спадзяецца, што прыезд Фядотава палепшым сітуацыю ў лініі брамнікаў. Тым не менш нядаўна Эрсан працягнуў кантракт на два гады, па якім будзе атрымліваць 859 тысяч долараў за сезон.

Коласаў стане другім беларускім брамнікам у АХЛ. З пачатку сезона там гуляе Мікіта Талапіла. 23-гадовы кіпер, які мае на руках кантракт з «Ванкуверам», бароніць вароты «Абатсфорда». Да сярэдзіны сакавіка мінчук канкураваў з 23-гадовым латвійцам Артурам Шылавым – найлепшым брамнікам ЧС-2023. Затым апошняга паднялі ў НХЛ, і Талапіла стаў безумоўным першым нумарам «Абатсфорда». Цяпер на рахунку выхаванца мінскага «Дынама» 30 матчаў, у якіх ён адбіў 90,5% кідкоў (40-ы ў АХЛ) пры каэфіцыенце надзейнасці 2,87 (43-і ў АХЛ). «Абатсфорд» ідзе сёмым у Ціхаакіянскім дывізіёне і мае шанцы патрапіць у Кубак Колдара.