Нападаючы зборнай Беларусі Гапон: «Ці чакалі мы такога выніку ў групе? Так, рыхтаваліся перамагаць у кожным матчы»
Нападаючы зборнай Беларусі па пляжным футболе Алег Гапон пракаментаваў выступленне каманды на групавым этапе ЧС.
– Якія ўражанні ад чэмпіянату свету?
– Узровень вельмі высокі. Усё добра арганізавана. Тут пабудавалі новы класны стадыён з якасным пяском, які, дарэчы, крыху глыбокі, але гуляць усё роўна прыемна.
Праўда, чэмпіянат свету ў Маскве быў арганізаваны лепш. Атмасфера ўсё ж прыемнейшая была, наша.
– Які з матчаў на групавым этапе можаце назваць самым цяжкім?
– Складана вылучыць. Усё ж гулялі з Сенегалам і Японіяй. Мусіць, усёткі з Японіяй было складаней усяго. Сенегал быў першым, тамака такія эмоцыі… Усё было «на свежаку». А з Японіяй ужо разумелі, што можам адабрацца ў чвэрцьфінал загадзя. Была пэўная адказнасць, якая ціснула. Плюс каманда саперніка была добра арганізавана.
– Чэмпіянат вы пачалі з хет-трыка Сенегалу, які многія адносілі да ліку фаварытаў. Ці адчулі вялікую ўпэўненасць пасля гэтай сустрэчы?
– Так. Мінулы раз яны абгулялі нас з лікам 7:2. Гэта ўдарыла па нас маральна. А тут перамаглі 6:4. А гэта ж Сенегал, які перайграў бразільцаў у чвэрцьфінале мінулага чэмпіянату свету! Суперкаманда! Таму пасля такога пачатку выходзілі да японцаў, якія не вельмі ўпэўнена згулялі з дэбютантам Калумбіяй, з поўнымі сіламі. Вікторыя над Сенегалам надала зборнай упэўненасці.
– А наогул чакалі такога выніку ад саміх сябе на групавым раундзе?
– Так, чакалі! Мы рыхтаваліся перамагаць у кожным матчы. Гэта ўжо трэці чэмпіянат свету для Беларусі. У мінулыя разы «апякаліся» ў групе. Цяпер трэба было ісці далей.
Зрабілі акцэнт на тым, што нельга расслабляцца пасля першай гульні. Звычайна мы ў стартавай сустрэчы выйгравалі, а далей адбывалася незразумела што. У гэты раз ужо настройваліся сур'ёзна і канкрэтна, – заявіў Гапон.
