Беларусь магла б узяць дзясяткі медалёў на ЕГ: у скачках справіліся б без Недасекава (не тое што ў бегу без Ціманаўскай), веславанне дала б зусім няшмат
І гэта толькі ў відах без паядынкаў сам-насам.
2 ліпеня ў польскім Кракаве падышлі да канца трэція Еўрапейскія гульні. На іх было разыграна 254 камплекты медалёў у 29 відах спорту. Прычым далёка не толькі звыклых алімпійскіх - у праграму ЕГ увайшлі і падзел (разнавіднасць тэніса двое на двое, у якой корт абнесены агароджай, і лічацца абсалютна ўсе рыкашэты), і тэкбол (гульня амаль футбольным мячом без рук па правілах амаль з настольнага тэніса). І нават любімы ў Польшчы зімовы від, скачкі з трампліна, уключылі - у летнім варыянце з прызямленнем на газон.
А вось прадстаўнікі Расіі і Беларусі ні ў адным відзе ўдзелу не прымалі. Арганізатары ЕГ адмовіліся дапускаць спартсменаў у адказ на вайну, якую з 24 лютага 2022 года працягвае Расія ва Украіне пры падтрымцы рэжыму Лукашэнкі і з выкарыстаннем тэрыторыі Беларусі. І пасля заканчэння турніру ніхто пра гэта не шкадаваў, колькі б ні крычалі ў рэжымным белспорце, што без іх кантынент не абыдзецца. «Лічу, што мы прынялі правільнае рашэнне. Я думаю, што ўсе ўбачылі выдатныя вынікі ўдзельнікаў ЕГ», - сказаў кіраўнік Еўрапейскіх алімпійскіх камітэтаў Спірас Капралас. «Спачатку мір [ва Украіне], кампенсацыя за разбурэнні, а ўжо потым - адкрытасць для прадстаўнікоў Беларусі і Расіі. Еўрапейскія гульні - сведчанне магчымасці арганізацыі такіх спаборніцтваў без гэтых спартсменаў», - заявіў міністр спорту Польшчы Каміль Бартнічук.
Мы ж звернемся да метаду, які самі не вельмі любім - параўнаем свежыя вынікі прызёраў ЕГ і беларускіх атлетаў, каб зразумець, колькі медалёў апошнія маглі б узяць. Зразумелая справа, гэта можна прыкінуць толькі ў дысцыплінах, дзе фіксуюцца метры і секунды - у праграме былі і некалі паспяховыя для Беларусі кікбоксінг і тайскі бокс, але іх мы праігнаруем, як і, напрыклад, стральбу з лука, дзе таксама выкарыстоўваецца сістэма паядынкаў двух канкрэтных. спартсменаў.
Што тычыцца патэнцыйна «медальных» відаў, сярод іх няма, напрыклад, гімнастыкі (не была ўключана ў праграму ЕГ-2023) і веласпорту (у Польшчы спаборнічалі толькі ў маўнцінбайку і BMX). Астатняе - вашай увазе.
Лёгкая атлетыка
Еўрапейскія гульні-2023 былі злучаныя з камандным чэмпіянатам Еўропы, але разыгрываць медалі Гульняў у асобных дысцыплінах гэта не замінала. Сваіх уладальнікаў з 20 па 25 чэрвеня знайшлі 38 камплектаў узнагарод. Для беларускіх лёгкаатлетаў у гэтыя тэрміны праходзілі ў Мінску "рэспубліканскія спаборніцтвы" - але мы гатовыя паглядзець і на суседнія старты ў календары. І асноўную ўвагу звяртае на сябе турнір у Брэсце 1-2 ліпеня - там многія беларускія атлеты паказалі свае найлепшыя вынікі за доўгі час.
У мужчын нечакана добра прабег 110 метраў з бар'ерамі Віталь Параханько - пры сустрэчным ветры ў 2,5 м/с паказаў вынік 13,38. Тыя ж секунды паказаў срэбны прызёр ЕГ Мілан Трайковіч з Кіпра - толькі ў яго выпадку быў спадарожны вецер 0,5 м/с. Так што Параханько можна запісаць гіпатэтычнае срэбра.
У кіданні дзіды даўні лідар беларускага сектара Аляксей Каткавец паказаў вынік 85,60 метра. Гэта на метр з лішнім лепей, чым хапіла на срэбра ЕГ - золата ж там узяў з паказчыкам 86,26 немец Юльян Вэбер.
Малатабоец Аляксандр Шымановіч у сваім сектары паслаў снарад на 80,26 метра. І гэта быў бы топ для ЕГ - там ніхто не пераадолеў такую круглую адзнаку, а чэмпіёнам стаў паляк Войцэх Навіцкі з вынікам 79,61 м.
На іншых спаборніцтвах у Брэсце 8 чэрвеня скакун у вышыню Дзмітрый Набокаў з першай спробы ўзяў 2,26 м, а затым і 2,29 м, выйграўшы спаборніцтвы. І з такім раскладам ён перамог бы і на ЕГ - там таксама ніхто не скокнуў вышэй за 2,29, але срэбны прызёр Томас Кармай з Бельгіі ўзяў гэтую вышыню з другой спробы, а чэмпіён італьянец Джанмарка Тамберы збіў планку ў адной спробе на 2,26. Калі што, абодва штурмавалі і 2,32 - але ў іх нічога не атрымалася. Падсанкцыйны прарэжымнік Максім Недасекаў, калі вам цікава, апошнім часам выступае толькі ў дзяржСМІ, прапускаючы спаборніцтвы.
Вернемся да свежага турніру ў Брэсце, бо там добрыя вынікі былі і ў жанчын.
Ядро Алены Дубіцкай паляцела на 19,46 метра - такога на ЕГ не было, чэмпіёнка Аўрыоль Донгма з Партугаліі штурхнула толькі на 19,07.
Шаставічка Ірына Жук увогуле пабіла рэкорд Беларусі – пераадолела планку 4,75 метра. Вынік чэмпіёнкі ЕГ фінкі Вілмы Мутра - 4,71 метра. Пасля гэтага яна тройчы беспаспяхова штурмавала 4,76.
Скакунка патройным Віялета Скварцова паляцела на 14,42 метра - на ЕГ гэта ўзровень срэбра, лепш там была толькі ўкраінка Марына Бех-Раманчук (14,58).
Карына Дзямідзік у сектары для скачкоў у вышыню паказала 1,94 метра. Гэта як у віцэ-чэмпіёнкі ЕГ румынкі Даніэлы Станчу - але яна, у адрозненне ад Дзямідзік, дабралася да гэтай вышыні без збітых планак. Таму прадстаўніцы Беларусі запішам віртуальную бронзу.
Дзідаметальніца Таццяна Халадовіч свой найлепшы вынік апошняга месяца паказала 17 чэрвеня ў Расіі - 61,22. У Брэсце ў яе было 61,00. Абодва - паміж другім і трэцім паказчыкам ЕГ, так што запішам падпісантцы за рэжым бронзу.
Медаль Беларусі магла б прынесці і Крысціна Ціманоўская - калі б яе не выціснулі з краіны за публічнае абурэнне чыста спартыўнай праблемай. 4 чэрвеня гэтага года на мемарыяле Януша Кусачынскага на 100-метроўцы бягуння паказала вынік 11,20 з нулявым ветрам - на ЕГ срэбны прызёр бельгійка Рані Росіус паказала тыя ж 11,20, але вецер крыху дапамагаў удзельніцам. Вышэй за ўзровень другога месца ЕГ Ціманоўская не так даўно прабегла і 200 метраў - 22,60 секунды 11 чэрвеня ў Беластоку, але тады спартсменцы спрыяў занадта моцны вецер (на Гульнях ён быў таксама спадарожны, але ў межах нормы).
З тых, хто не трапіў бы ў медалі, адзначым натуралізаванага расіяніна-шаставіка Мацвея Волкава - за апошні месяц ён паказваў максімум 5,71, на ЕГ усе прызёры пераадолелі планку ў 5,80. Эльвіра Грабарэнка (экс-Герман) таксама ў медалі не патрапіла б: найлепшы яе вынік за апошні месяц на 100 метрах з бар'ерамі - 12,84, а бронзавая медалістка ЕГ ірландка Сара Левін паказала вынік 12,82.
Адносіцца гэта і да прарэжымніцы Анастасіі Мірончык-Івановай. На свежым турніры ў Брэсце яе найлепшы вынік пры дапушчальным ветры - скачок у даўжыню на 6,56 метра, тады як мінімум сярод прызёрак ЕГ быў 6,66. Адзначым, што брэсцкія спаборніцтвы Мірончык-Іванова па дадатковых паказчыках прайграла Скварцовай, якая паспявае скакаць двума стылямі.
Агулам патэнцыйных медалёў у лёгкай атлетыцы: 10 (4 золаты, 4 сярэбраныя, 2 бронзавыя)
Веславанне на байдарках і каноэ
Тут спаборніцтвы ў межах ЕГ прайшлі з 21 па 24 чэрвеня ў 16 дысцыплінах на дыстанцыях максімум 500 метраў. Апошняе на цяпер спаборніцтва беларускіх весляроў - этап Кубка Беларусі, які праходзіў з 23 па 26 траўня. Што ж, праз адсутнасць лепшага параўнаем гэтыя вынікі.
У каноэ-адзіночцы на 200 метрах КБ выйграла Юлія Трушкіна з часам 47,411. Гэта на тры дзясятыя секунды лепш, чым трэцяе месца ЕГ.
Заезд байдарак-адзіночак на 200 метраў на КБ выйграла Маргарыта Махнева (40,527), другой стала лукашыстка Марына Літвінчук (40,764). Лепш за іх на ЕГ секунды паказала толькі датчанка Эма Ёргенсэн – то бок можна было б забраць срэбра і бронзу.
Як ні дзіўна, на гэтым усё - у астатніх дысцыплінах на ЕГ паказвалі прыкметна больш хуткі час, чым на беларускім узроўні. Нават медальная на ўзроўні Алімпійскіх гульняў байдарка-чацвёрка Ліцвінчук, Махневай, Надзеі Папок і Вольгі Худзенка выйграла КБ з такім нізкім вынікам (1:35,629), што яго перасягнулі ўсе дзевяць каманд, якія ўдзельнічалі ў фінале ЕГ (зрэшты, незразумела, куды было тытулаванаму экіпажу спяшацца ў КБ).
Агулам патэнцыйных медаляў у веславанні: 3 (2 срэбра, 1 бронза)
Сучаснае пяцібор'е
У пентатлоне ёсць элемент спаборніцтваў сам-насам - фехтаванне, таму экстрапаляваць вынікі недарэчна. Але ўсё ж зробім кароткую спробу параўнаць вынікі пераможцаў ЧБ (прайшоў 11-17 чэрвеня) з паказчыкамі на ЕГ (22-25 чэрвеня) сярод мужчын і жанчын.
Мужчынскую частку ЧБ выйграў Уладзіслаў Несцераў. У фехтаванні ён выйграў 24 з 36 паядынкаў, гэта значыць дзве траціны. З такім паказчыкам (дапусцім, што ён захаваецца) на ЕГ набіралі прыкладна 230 ачкоў у залік. У астатніх дысцыплінах у пяціборцаў сістэма пераводу ў ачкі на любым спаборніцтве аднолькавая - так што проста пераносім. У канкуры ў Несцерава было 293 ачкі (з 300 магчымых). У плаванні ён паказаў вынік 2.07:87 - на ЕГ такім павольным не быў ніхто, у пераліку гэта 295 ачкоў. Лазер-ран жа з часам 10:21,67 прынёс 679 балаў. Агулам пад 1500 ачкоў - можна было б замкнуць топ-10 ЕГ, але пра медалі гаворкі б не ішло.
Жаночую праграму ЧБ выйграла фанатка Лукашэнкі Вольга Сілкіна. У фехтаванні ў яе таксама прыкладна дзве траціны перамог (21 з 31), на ЕГ гэта дало б прыкладна 230 ачкоў. Яшчэ былі максімальныя 300 балаў на кані, 272 балы за плаванне (на ЕГ менш набралі толькі пяць спартсменак) і 588 - за лазер-ран (павольней былі толькі трое ўдзельніц ЕГ). Разам пад 1400 балаў - і гэта недзе каля топ-10, нават не ўнутры. Увогуле, шанцаў на медалі з такімі вынікамі не бачна.
Агулам патэнцыйных медаляў у пяцібор'і: 0
Стральба
Стралковая праграма на ЕГ была разнастайная. У беларускіх стралкоў, калі верыць сайту іх федэрацыі, апошнімі міжнароднымі спаборніцтвамі былі казахстанскія Altyn Mergen у красавіку. З іх ёсць і пратакол - і калі параўнаць яго з вынікамі Еўрапейскіх гульняў, то атрымаецца, што беларускія стралкі маглі прэтэндаваць на шэраг медалёў. Праўда, часта незразумела, залатых або срэбных - паміж першымі двума месцамі па выніках віду запускаюць асабісты паядынак, які часта заканчваецца перамогай «аўтсайдэра». Але, прынамсі, зафіксуем красавіцкія поспехі:
• у стральбе на 10 метраў з пнеўматычнай вінтоўкі Уладзіслава Пранько набрала 262,0 ачка - больш, чым лідар фіналу ЕГ Каміла Новотна са Славакіі (260,8), а Уладзімір Чарноў - столькі ж, колькі немец Максіміліян Ульбрых (261,5);
• у стральбе на 50 метраў з пнеўматычнай вінтоўкі з трох пазіцый Дар'я Чупрыс запісала на свой рахунак 410,5 бала (у фінале ЕГ больш за ўсіх набрала Наталля Каханская з Польшчы, яе вынік склаў 410,0), Юрый Шчарбацэвіч паказаў 411,6 бала (у лідара ЕГ чэха Іржы Прыбрацкага было 409,6), а Ілля Чаргейкі - 408,0 (у таго, хто фінішаваў за Прыбрацкім, было 407,0);
• у стральбе на 10 метраў з пнеўматычнага пісталета Уладзіслаў Дэмеш меў 249,5 пункта - на ЕГ саступаў бы толькі немцу Робіну Вальтару (252,0).
Агулам патэнцыйных медалёў у стральбе: 6
На гэтым, мабыць, усё - складана ўявіць, каб хтосьці прадставіў Беларусь у брэйк-дансе, спартовым скалалажанні і нават трыятлоне, якія былі прадстаўлены на ЕГ.
Выходзіць, што беларускія спартсмены толькі ў відах без паядынкаў сам-насам маглі б забраць у тэорыі пад 20 медалёў, з якіх 4-6 залатых – узровень топ-20 агульнага заліку. Але гэта толькі грубыя прыкідкі - а ў рэальнасці спаборніцтвы на падобным узроўні калі і наступяць для белспорту, то там трэба будзе яшчэ справіцца са стаўленнем, прынамсі, з боку ўкраінцаў.
