Ціманоўская з мужам прабылі 10 гадоў, а цяпер – усё: прапанова пад Эйфэлевай вежай, Audi у падарунак, на якой вывезла рэчы

Адпраўляючыся ў пачатку верасня на мемарыял Збігнева Людвічоўскага, лёгкаатлетка Крысціна Ціманоўская ўжо ведала, што яе стасункі з мужам падышлі да канца. Арсеній Зданевіч – фітнес-трэнер і ў мінулым прызёр чэмпіянатаў Беларусі ў барʼерным бегу. У аўторак бягуха паведаміла ў Instagram пра расстанне з мужам пасля шасці гадоў шлюбу. Спартсменка падзякавала Зданевічу за два гады ў эміграцыі, за падтрымку і дапамогу ў падрыхтоўцы да спаборніцтваў. Пара вырашыла абысціся без судовых разбіральніцтваў, мірна падзяліўшы маёмасць. Ціманоўская зʼехала з кватэры і збіраецца ў адпачынак у Грэцыю, каб там перазагрузіцца пасля расстання.

Расказваем галоўныя факты пра сямʼю Ціманоўскай і Зданевіча, якая ў апошнія пару гадоў прайшла праз вялікія выпрабаванні.

Прабылі разам 10 гадоў

Крысціна і Арсеній пазнаёміліся ў 2013 годзе, калі 17-гадовая лёгкаатлетка вучылася ў выпускным класе мінскага Рэспубліканскага вучылішча алімпійскага рэзерву. Праз месяц маладзёны пачалі сустракацца. Як расказвала Ціманоўская, тады ў іх асяроддзі многія казалі, што адносіны доўга не працягнуцца. А вось ураджэнка Клімавічаў была перакананая, што ў іх з барʼерыстам усё сурʼёзна.

Зрабіў прапанову каля «Эйфэлевай вежы»

Зрэшты, яшчэ тады пара разыходзілася, але толькі на месяц. У 19 Ціманоўская і яе бойфрэнд сталі жыць разам, хаця бацькі дзяўчыны гэтага не ўхвалялі.

На чацвёртым годзе адносін Арсеній вырашыўся зрабіць прапанову. Крысціна марыла, каб гэта адбылося пад Эйфэлевай вежай. Зданевіч здзейсніў жаданне, але абышоўся без паездкі ў Парыж. Малады чалавек прыкінуўся хворым, каб Крысціна за ім падаглядала, а потым...

«Ён мяне перахітрыў і падстроіў усё, не ўстаючы з ложка. Падгаварыў сябра, неяк купіў пярсцёнак, замовіў рэстаран, купіў мне сукенку і брошку і ў першы ж дзень, як акрыяў, сказаў: «Надзень усё, што я табе купіў. Мы паедзем у адно месца!» Я, вядома ж, не здагадвалася, куды і навошта мы едзем», – успамінала потым спартоўка.

Зданевіч прывёў сваю абранніцу ў французскі рэстаран у Мінску, дзе стаяла Эйфэлевая вежа ў мініяцюры. Там афіцыянт пад фуагра і прынёс пары заручальны пярсцёнак. Вяселле адбылося ў жніўні 2017-га.

Стаў трэнерам для жонкі

У наступным годзе Зданевіч скончыў з лёгкай атлетыкай праз траўму, аднак не сышоў са спорту – уладкаваўся інструктарам-метадыстам у сталічны РЦАП, дзе дапамагаў трэнавацца сваёй жонцы. Малады спецыяліст зарабляў прыкладна 400 рублёў і быў вымушаны шукаць дадатковыя крыніцы заробку. Напрыклад, падпрацоўваў таксістам. Яшчэ быў асабістым кіроўцам у казіно і наведваў курсы па масажы і фітнесу. Незадоўга да эміграцыі Зданевіч уладкаваўся ў фітнес-цэнтр, дзе, паводле аповядаў Ціманоўскай, на выпрабавальным тэрміне зарабіў 2500 рублёў – і ў будучыні павінен быў зарабляць у два з лішнім разы больш, але планы рэзка змяніліся.

Муж эміграваў услед за жонкай

Пасля спробы беларускіх спартыўных чыноўнікаў сілком вывезці Ціманоўскую з Алімпіяды ў Токіа Зданевіч зразумеў, што яму таксама давядзецца пакінуць Радзіму. Спачатку мужчына выехаў у Расію, а адтуль выправіўся да знаёмых ва Украіну. Сваякі і знаёмыя перажывалі праз усю гэтую сітуацыю – сярод іншых Зданевічу тэлефанавала ягоная экс-трэнер Аліна Талай, якая потым без тлумачэння спыніла з ім зносіны.

Спачатку пара не ведала, як жыць далей, але Ціманоўскай прапанавалі выступаць за зборную Польшчы, і сямʼя ўладкавалася ў гэтай краіне, дзе першыя месяцы па патрабаванні спецслужбаў жыла пад наглядам двух ахоўнікаў.

За два гады ў Польшчы тройчы расставаліся

Пра гэта спартсменка сама расказала ў Instagram. На сямʼю ціснулі розныя абставіны. Напрыклад, першы час пары не было дзе жыць у Польшчы, працы таксама не было, а зберажэнні складалі ўсяго каля тысячы долараў.

«Праз сваркі маглі не размаўляць тыдзень-два. Аб прычынах не хацеў бы казаць – гэта асабістае. У некаторых момантах я няправільна паступаў, у некаторых – яна. Адно на другое і накладвалася. Але потым астывалі і разумелі, што родніць нас значна больш [чым падзяляе]», – дзяліўся Зданевіч.

Паступова побыт наладзіўся. Ціманоўская трапіла ў зборную Польшчы, а Зданевіч пачаў бізнес па перапродажы аўтамабіляў з плыўцом Яўгенам Цуркіным, які сам нядаўна расстаўся з алімпійскай прызёркай Аляксандрай Герасіменяй.

Крысціна і Арсеній спрабавалі захаваць адносіны. Напрыклад, адно з замірэнняў адбылося ў Парыжы на дзень нараджэння бягухі. Але гэта дало кароткачасовы эфект.

Яшчэ нядаўна атрымала ў падарунак Audi

У жніўні 2023-га пара святкавала шостую гадавіну вяселля і абмянялася дарагімі падарункамі. Зданевіч купіў жонцы новую Audi, каб было зручна ездзіць на трэнаванні (у выніку павезла на машыне рэчы з кватэры, якую здымалі з мужам). Дзяўчына адказала швейцарскім гадзіннікам ад брэнда Roamer.