За «Макслайнам» (і клубам, і букмекерам) стаіць айцішнік, які добра плаціць Пунтусу і звязаны з «Арысам»
Аматар більярду, улюблёны ў футбол.
У гэтым сезоне футбольны клуб «Макслайн» перажыў нямала цікавага: і трэнерскія ператасоўкі, якія ўвянчаліся вяртаннем Юрыя Пунтуса, і масавая змена гульцоў у сярэдзіне чэмпіянату, і разборкі паміж ідэйным натхняльнікам праекту і галоўным фундатарам. У выніку экс-рагачоўскі, а цяпер віцебскі букмекерскі праект фінішаваў толькі пятым у першай лізе і не заваяваў права на павышэнне. Праўда, ёсць яшчэ варыянты. «Макслайн» гатовы ўвайсці ў Д1, калі там утворыцца вакансія – напрыклад, адваліцца адна з каманд.
Пра гэта на днях у інтэрвʼю прэс-службе клуба, якое было апублікавана чамусьці ў google-doc, заявіў Арцём Лявонаў. Раней гэты чалавек быў вядомы выключна як заснавальнік букмекерскай канторы «Макслайн». Аднак цяпер яго наўпрост называюць і ўласнікам футбольнага клуба. Расказваем, што нам удалося пра Лявонава даведацца.
Праграміст, заснавальнік канторы, аматар снукера
У адкрытым доступе інфармацыі пра Лявонава зусім няшмат. Пра сваё жыццё ў прэсе прадпрымальнік не распавядае, сацсеткі асабліва не вядзе, хаця мае старонку «УКантакце».
13 лютага наступнага года ўраджэнцу Віцебска споўніцца 37. Да 2004-га ён вучыўся ў сярэдняй школе ў родным горадзе, пасля атрымаў адукацыю ў сферы праграмавання. Як расказваў сам Лявонаў, пасля вучобы ён уладкаваўся ў адну з букмекерскіх кантор Віцебска. Па некаторых звестках, гэта была БК Plus Minus, якая існавала з 1994 гады. За пяць гадоў працы Лявонаў вывучыў унутраную кухню гэтага бізнэсу і зразумеў, што саспеў для ўласнай справы. Гэта і прывяло да стварэння букмекерскай кампаніі Maxline. Па словах Лявонава, для старту яму спатрэбілася 50 тысяч долараў.
Па нашых звестках, гэты праект запускаўся не ў адзіночку, а разам з нейкім партнёрам. Яго асобу нам не ўдалося раскрыць. Няма інфармацыі пра сузаснавальніка Maxline і ў букмекерскіх колах, аднак наяўнасць у Лявонава партнёра, які да гэтага часу дапамагае кіраваць контрай, там пацвярджаюць.
Maxline – не самы буйны гулец на беларускім букмекерскім рынку, але самы заўважны з тых, хто мае чыста беларускае паходжанне. Кампанія актыўна рэкламуецца. Да нядаўняга часу яе амбасадарам быў тэнісіст Максім Мірны.
Але калі да спартсмена і ягонага бацькі ўзніклі прэтэнзіі з боку сілавікоў Лукашэнкі (падставай стаў пост у Instagram з просьбай спыніць гвалт), букмекерская кантора ціха і незаўважна спыніла супрацу.
Цяпер на афіцыйным сайце БК значацца толькі два амбасадары – экс-футбаліст Віталь Радзівонаў і дзейны баец MMA Вадзім Куцы.
Лявонаў жа, стварыўшы букмекерскую кантору, сумясціў сваю адукацыю праграміста і сваю любоў да спорту. Па расказах нашых крыніц, віцяблянін даўно сачыў за футбольнымі чэмпіянатамі розных краін і сам працягвае гуляць у вольны час. Захапляўся і менш папулярнымі відамі спорту. Напрыклад, адным з любімых відаў баўлення часу Лявонава быў і застаецца снукер. Некаторыя крыніцы сцвярджаюць, што заснавальнік Maxline нават удзельнічаў у аматарскіх більярдавых турнірах.
Што да чалавечых якасцяў, то яго характарызуюць як жорсткага кіраўніка. Стыль і метады прыводзяць да таго, што ў букмекерскай канторы ў апошнія гады адзначаецца высокая цякучка кадраў.
Спачатку быў спонсарам і назіральнікам, а цяпер шматлікае вырашае
Футбольны клуб «Макслайн» зʼявіўся ў сістэме беларускіх ліг у 2021 годзе на базе рагачоўскага «Дняпра» з Д3. Тагачасны дырэктар ФК Андрэй Іваненка дапамогі ад уладаў Рагачова не дачакаўся і адшукаў прыватнага фундатара. Ім стала БК Maxline. Згодна з умовамі супрацы, клуб узяў сабе назву букмекерскай канторы.
Па сутнасці, так Лявонаў аказаўся ў вялікім футболе, хай і на ўзроўні беларускага Д3.
- Першапачаткова, калі клуб перайменавалі ў «Макслайн», мэтай была толькі рэклама, але затым я настолькі ўлюбіўся ў гэтую справу, у футбол, што сёння не ўяўляю свайго жыцця без футбольнага клуба «Макслайн», – сказаў нядаўна Лявонаў.
Першапачаткова букмекер у клубныя справы не ўмешваўся і проста назіраў збоку. А ўсімі працэсамі ў «Макслайне» запраўляў Іваненка. Аднак, як кажуць нашыя суразмоўцы, з цягам часу Лявонаў уцягнуўся ў вялікі футбол і захацеў большага ўплыву. У выніку ў сезоне-2023 адбыліся глабальныя перамены, пра якія расказвала «Трыбуна». Іваненку ад спраў адціснулі, звінаваціўшы ў няўдачах на старце чэмпіянату і памылках пры селекцыі.
Мяркуючы па ўсім, расстанне атрымалася далёка не сяброўскім, таму што ў нядаўнім інтэрвʼю заснавальнік БК заявіў, што ягоным экс-дырэктарам рухала толькі «прага нажывы», і што Іваненка жадаў прадаць клуб іншай букмекерскай кампаніі і тым самым дасягнуць сваіх карыслівых мэт. Падводзячы вынік, Лявонаў рэкамендаваў футбольным функцыянерам не звязвацца з Іваненка. Той пакуль на гэтыя выпады публічна не рэагаваў.
На сайце клуба Лявонава можна знайсці ва ўкладцы «Кіраўніцтва». Там ён пазначаны як «генеральны менеджар каманды».
Аднак, як запэўніваюць нашыя крыніцы, афіцыйна Лявонаў у клубе ніякай пасады не займае – ні дырэктар, ні старшыня, ні генеральны менеджар. Гэта немагчыма ў прынцыпе, бо Лявонаў па-ранейшаму зʼяўляецца сузаснавальнікам і адным з кіраўнікоў букмекерскай канторы. А згодна з «Кодэксам гонару», які рассылае АБФФ, адначасова працаваць і ў клубе, і ў букмекерскай канторы забаронена (артыкул 7). Зрэшты, гэта не перашкодзіла ФК «Макслайну» унесці Лявонава ў заяўку на сезон як менеджара каманды. АБФФ на гэта ніяк не адрэагавала. Зрэшты, чыста фармальна пасада не мае дачынення да кіравання.
Як нам удалося даведацца, дырэктарам ФК «Макслайн» на сёння зʼяўляецца нейкі В.Фаўстовіч, а ягоным намеснікам – Дзяніс Лукашоў. А вось уласнікам у дакументах указаны нейкі Рабцаў. Чалавек з такім прозвішчам (Сяргей Рабцаў) зʼяўляецца намеснікам дырэктара БК Maxline па развіцці. Аднак, паводле нашых звестак, па паперах футбольным клубам валодае не ён, а ягоны сваяк. На сайце ФК як дырэктар клуба прадстаўлены Лукашоў, але, паводле анлайн-сэрвісу праверкі арганізацый Беларусі па УНП, такім як мінімум афіцыйна зʼяўляецца Фаўстовіч. Пасаду ён заняў 23 лістапада 2023 года.
Аднак гэта ўсё фармальнасці. Насамрэч усімі працэсамі ў клубе запраўляе ўласнік букмекерскай канторы Лявонаў, хоць у яго ў структуры і няма афіцыйнай пасады. Дапамагаюць яму гулец «Макслайна» Сяргей Балановіч і галоўны трэнер Юры Пунтус – вялікі футбольны досвед гэтых людзей выклікае давер у бізнесмена.
Гэтае трыа разам вырашае пытанні селекцыі, заробкаў гульцоў і гэтак далей. Пры гэтым сваім футбольным дарадцам Лявонаў не пашкадаваў сурʼёзных для першай лігі грошай. Па нашых звестках, у сезоне Балановіч атрымліваў у «Макслайне» пяць тысяч рублёў штомесяц плюс бонусы, Пунтус – восем тысяч рублёў плюс бонусы. У той жа час найлепшы бамбардзір калектыву ў сезоне-2023 (20 галоў у Д2) 19-гадовы Іван Грудзько меў аклад у тысячу рублёў.
Лявонаў арыентуецца на «Арыс» – і не проста так
Нядаўна ва ўласніка БК і фундатара ФК спыталі, мадэль развіцця якога клуба зʼяўляецца для яго арыенцірам, і Лявонаў вылучыў кіпрскі «Арыс» з Лімасола:
Недавно у владельца БК и спонсора ФК спросили, модель развития какого клуба является для его ориентиром, и Леонов выделил кипрский «Арис» из Лимассола:
- У мяне там вельмі шмат сяброў, і мне падабаецца іх стратэгія развіцця. Вельмі важна адзначыць, што каманда будавалася не на ўсім гатовым, а паступова. Іх шлях да перамогі ў чэмпіянаце Кіпра ляжаў з ніжэйшых дывізіёнаў, а сёння яны ўжо гуляюць у Лізе Еўропы, дэманструючы добрыя вынікі, – казаў Лявонаў.
Пра тое, як уладкованая праца ў «Арысе», хто кіруе клубам і як ён звязаны з Беларуссю, «Трыбуна» ужо расказвала.
Лявонаў таксама ў некаторай ступені звязаны з гэтым кіпрскім праектам. Прэзідэнтам «Арыса» як бы зʼяўляецца беларускі бізнесмен Уладзімер Фёдараў. Аднак, як кажуць нашыя крыніцы, гэта прэзідэнт толькі па паперах, хутчэй «галава для прамоваў» і «прадстаўнік клуба». Куды большы ўплыў на вызначальныя працэсы ў «Арысе» аказвае беларус Мікалай Васкабойнікаў. Менавіта Васкабойнікаў – галоўны спонсар клуба, а яшчэ ён сябар і зямляк Лявонава. Абодва нарадзіліся ў Віцебску і знаёмыя вельмі даўно.
Васкабойнікаў вядомы як адзін з топавых беларускіх пакерыстаў. На сёння агульная сума ягонага заробку за гульнявым сталом складае больш за тры мільёны долараў – гэта 675-е месца ў сусветным рэйтынгу па выйгрышах.
Па звестках нашых крыніц, Васкабойнікаў актыўна ўкладвае свае грошы ў «Арыс», выдаткоўваючы сурʼёзныя сумы на развіццё каманды і заробкі. Пры гэтым беларус зарабляе далёка не толькі покерам – у яго ёсць сурʼёзны прыбытак і з іншых крыніц. Гэтая акалічнасць дазваляе Васкабойнікаву неафіцыйна дапамагаць і віцебскай камандзе, справамі ў якой запраўляе ягоны таварыш Арцём Лявонаў. Так што арыентацыя боса «Макслайна» на «Арыс» цалкам лагічная і вытлумачальная.
Фота: fcml.by, vk.com, cardmates.net
