Брамнік «Нафтана» Харытонавіч: «Будзем старацца зарабляць не па адным бале, а па тры»
Брамнік «Нафтана» Аляксей Харытонавіч пракаментаваў матч супраць мінскага «Дынама» (2:2).
– Напэўна, чарада моцных сапернікаў завяршылася, вось гэтыя тры стартавыя туры. Як яны прайшлі для «Нафтана»?
– Скажу, што чарада не скончылася. Усе супернікі вартыя павагі. Будзем да ўсіх рыхтавацца аднолькава, настройвацца толькі на станоўчы вынік. Дзякаваць заўзятарам за тое, што прыязджаюць і падтрымліваюць нас.
– У вас нейкая традыцыя, як у брэстчанаў са сваімі заўзятарамі? Перад гульнёй падышлі да трыбунаў, папляскалі.
– Мы вырашылі, што нейкую традыцыю будзем ствараць. Зноўку фармуецца клуб – і вось хацелі больш яднання з заўзятарамі, з горадам.
– Два балы ў трох стартавых турах. Наколькі гэта вынік, на які разлічвалі?
– І не добра, і не дрэнна. Супернікі, калі глядзець мінулыя гады і заслугі, павінны быць уверсе турнірнай табліцы. Напэўна, годны вынік, але хацелася б у такіх матчах перамагаць. Нават з «Нёманам» вялі. Сёння, калі б не прапусцілі ў канцы першага тайма, то невядома, як склалася б сустрэча. Далей будзем старацца зарабляць не па адным бале, а па тры.
– Вялі 2:0, прапусцілі ў распранальню. Што казаў трэнер у перапынку?
– Сказаў не апускаць рукі, далей працягваць паказваць сваю гульню. Мы так і рабілі, не адыходзілі ад плана. Былі моманты ў нас, каб закрыць гульню.
– Ты сказаў, што трэба было прытрымлівацца плана на гульню. Але чаму прыціснуліся на старце другой паловы?
– Быў зроблены акцэнт на контратаку. Гледачы гэта разумелі. Але дзесьці не разабраліся ў абароне і прапусцілі другі.
– Гэтая нічыя для «Нафтана» – набыццё або страта?
– Мы на выездзе гулялі, таму набыццё, – сказаў Харытонавіч.