Дырэктар польскага ліцэю прайграў грошы вучняў, ставячы на спорт, і ўцёк у Беларусь, але прабыў там нядоўга

Дзіўная гісторыя адбылася ў польскім горадзе Буска-Здруй, дзе дырэктар мясцовага ліцэю прайграў грошы сваіх школьнікаў. Распавяло пра гэта выданне «МОСТ».

Як прызнаваўся на судзе Томаш Г., праблемы з азартнымі гульнямі ў яго пачаліся яшчэ ў 2012 годзе, але ў нейкі момант мужчына здолеў прызнаць сваю залежнасць і пайсці на тэрапію. Лячэнне дапамагло пратрымацца «ў завязцы» амаль два гады, але ў 2019-м гульняманія вярнулася – мужчына зноў пачаў рабіць стаўкі на спорт. Спачатку прайграваў уласныя сродкі, але ў нейкі момант стаў браць грошы са школьнага сейфа, якія прызначаліся на школьныя паездкі. Хаваць крадзёж дапамагала пандэмія, якая скасавала ўсе паездкі, а потым і вайна.

«Здаралася, што настаўнікі ці школьнікі пыталіся пра паездкі, але я іх адкладаў, апраўдваючыся пандэміяй і вайной. Гэта дазваляла выйграць час», – прызнаваўся мужчына на судзе.

Дырэктар спадзяваўся, што здолее адыграцца, але патраціў на гэта ўсю суму з сейфа, то-бок амаль 500 тысяч злотых (прыкладна 116 тысяч еўра). У верасні 2022-га, усвядоміўшы, што ён не можа больш адказваць на пытанні пра грошы, Томаш не выйшаў на працу і збег у Беларусь. Хоць сам дырэктар настойвае на тым, што гэта не была ўцёкамі, аргументуючы гэта папярэднімі кансультацыямі з паліцыяй і консульствам.

Спачатку пра знікненне дырэктара заявіла яго сям'я, а пасля ў школе заўважылі страту грошай.

У Беларусі паляк прабыў 10 дзён, пасля чаго вярнуўся на Радзіму, дзе яго і затрымалі. Прычыну такога кароткага ваяжа мужчына не патлумачыў, але суд гораду Кельцэ прыняў ва ўвагу, што ён добраахвотна вярнуўся з-за мяжы, не перашкаджаў крымінальнай вытворчасці, прызнаў сябе вінаватым і ўжо пачаў пагашаць доўг. Дырэктару прысудзілі 2 гады і 10 месяцаў пазбаўлення волі, а таксама абавязалі пагасіць рэшту доўга.