Ігнат Галавацюк: «Ніякіх упадніцкіх настрояў з-за міжнароднага бана не адчуваю. Дзяржава вельмі нас падтрымлівае»
Канькабежац Ігнат Галавацюк выказаўся пра міжнародны бан.
Нагадаем, што шматлiкія беларускія каманды і спартсмены былі адхіленыя ад міжнародных спаборніцтваў у адказ на вайну, якая з 24 лютага 2022 года працягваецца Расiяй ва Украіне з выкарыстаннем тэрыторыі Беларусі.
– Мінулы сезон з-за дыскваліфікацыі атрымаўся не тое каб непаўнавартасным, а хутчэй незвычайным. Так, з прычыны палітычнага адхілення мы не мелі міжнароднай практыкі, але было шмат стартаў у Расіі і Беларусі. І ў прынцыпе, усё, што планавалі, выканалі: і датычна праграмы збораў, і турніраў. Плюс крыху змяніў трэніровачны план у разрэзе чатырохгадовай падрыхтоўкі да Алімпіяды-2026. Я дастаткова ўзроставы спартовец, ужо 26, і мне неабходна канцэнтравацца і развіваць тыя якасці, якім раней надаваў менш увагі.
– Адхіленне ад сусветных і еўрапейскіх спаборніцтваў неяк адбілася на вашай матывацыі?
– Ніякіх упадніцкіх настрояў не адчуў і не адчуваю. Хутчэй, наадварот. Ведаеце, пасля Алімпіяды ў Пекіне адбыўся прыліў матывацыі, энергіі і жаданні працаваць. Можна сказаць, паверыў у сябе. На дыстанцыі 1000 метраў на Гульнях мне не хапіла ўсяго 15 сотых секунды да бронзавага медаля, я паказаў вельмі высокі вынік і зразумеў, што магу бегчы сапраўды хутка. Мінулы сезон на гэтым усплёску правёў, лічу, таксама добра.
– Дзяржава падтрымлівае вас?
– Вельмі! Ведаю, што некаторыя расійскія канькабежцы мяняюць грамадзянства – з'язджаюць у Казахстан, Кітай, Еўропу… Прычым спартсмены тытулаваныя і вельмі перспектыўныя, такія як Лізавета Голубева, Крысціна Сілаева… Расійская Федэрацыя ніяк не можа іх утрымаць і зацікавіць, больш за тое, расказвалі, што некаторым заробкі абрэзалі. Мне цяжка меркаваць, можа, краіна ў іх паслугах больш не мае патрэбы, але ў Беларусі мы сваю неабходнасць адчуваем і не пакрыўджаныя, – сказаў Галавацюк.
