Ганна Гуськова: «Без зборных Беларусі і Расіі на Кубку свету няма асабліва прыгожага фрыстайла»
Беларуская фрыстайлістка Ганна Гуськова расказала пра сваю падрыхтоўку да ўсерасійскай спартакіяды.
– У цэлым, з якім настроем і ў якой фізічнай форме Вы адправіцеся на ўсерасійскую спартакіяду? Ці будуць складаныя скачкі або стаўка ўсё ж на якаснае выкананне прасцейшых?
– У нас яшчэ ёсць час, і мы абмяркуем планы з трэнерскім складам. Але ў Краснаярску, дзе пройдуць спаборніцтвы, яшчэ ні разу не была. Для мяне гэта новы досвед. Кажуць, там вельмі добры схіл, таму будзе дастаткова цікава. Адзінае, што мяне бянтэжыць, – гэта пагодныя ўмовы: там звычайна вялікі мінус. Цяпер знаходжуся ў добрай фізічнай форме, я б нават сказала, што ў выдатнай. Таму з пазітыўным настроем паімчым у Краснаярск.
– Вы трэніруецеся бок аб бок з дзяўчынкамі з расійскай каманды. Наколькі на Спартакіядзе можна чакаць яркага суперніцтва?
– У жаночай зборнай Расіі таксама не так шмат дзяўчынак, але ёсць канкурэнцыя. Хацелася б, праўда, каб яна была большая, каб і самой расці ў гэтым плане.
– Ці сочыце за іншымі спартсменамі, якія выступаюць на этапах Кубка свету? Ці адбілася адсутнасць беларусаў і расіян на градусе барацьбы?
– Так, тое, што цяпер няма нашай зборнай і зборнай Расіі, паўплывала. Няма асабліва прыгожага фрыстайла. Сачу за дзяўчынкамі, за аўстралійкамі, бачу, што дадала амерыканская зборная. Аднак, не думаю, што мы ў нечым адстаем. У нас наперадзе спаборніцтвы – яшчэ пакажам ім! – сказала Гуськова.