У топ-беларускі ў тэнісе ўжо выпадаў з акна бойфрэнд. Праўда, гэта быў не суіцыд
Украiнец, якi занадта хацеў выйсці з пакоя.
Прэс-служба паліцыі Маямі ў каментарыi Tribuna.com унесла яснасць наконт гібелі хакейнага трэнера Канстанціна Кальцова. У панядзелак ноччу бойфрэнд тэнісісткі Арыны Сабаленка саскочыў з балкона гатэля ў прыгарадзе Маямі. У паліцыі тое, што здарылася, назвалі «відавочным самагубствам».
Гэтая сітуацыя навеяла ўспаміны пра іншы выпадак. У 2010-м Вікторыя Азаранка пачала сустракацца з тэнісістам Сяргеем Бубкам – сынам легендарнага скакуна з шастом Сяргея Бубкі. За час рамана беларуская тэнісістка выйграла свой першы турнір Вялікага шлема – Australian Open-2012 – і ўзначаліла рэйтынг WTA.
У лістападзе 2012-га ў Парыжы адбыўся няшчасны выпадак. Ці то на вечарынцы, ці то пасля яе Бубка апынуўся ў шыкоўных апартаментах свайго знаёмага – і нехта зачыніў дзверы. А Бубка вырашыў, што яму ўсё роўна абавязкова трэба выйсці – і ўбачыў варыянт за акном.
«Галоўнае, што я памятаю: мяне замкнулі ў спальні, я паспрабаваў выбрацца, не змог адчыніць або выламаць дзверы – і знайшоў акно. Гэта цяжка растлумачыць. Там быў вельмі доўгі, па сутнасці, падваконнік – пласціна, якая закрывала кандыцыянеры. Яна выглядала як падлога, таму што была вельмі шырокай і металічнай. Я абапёрся на яе – і яна павалілася. Я не спрабаваў прайсціся ці скокнуць, я проста абапёрся», – потым казаў Бубка.
Так ён выпаў з акна трэцяга паверха – некалькі хвілін ляжаў унізе, потым страціў прытомнасць, а ў сябе прыйшоў у бальніцы. Неўзабаве туды прыйшла і Азаранка, якую ўсе медыя на той момант лічылі дзяўчынай Бубкі.
«На некалькі дзён прыляцела ў Парыж, каб убачыць Сяргея Бубку. Ён паступова папраўляецца. Вялікі дзякуй усім за паведамленні і словы падтрымкі», – напісала Вікторыя ў сацсетках праз некалькі дзён пасля таго, што адбылося.
Зрэшты, потым аказалася, што падзенне Бубкі адбылося ўжо пасля раставання з Азаранка. Неўзабаве пасля парыжскіх падзей тэнісістка заявіла, што яны з украінцам ужо некаторы час не пара, а толькі сябры. Прычыны разрыва Азаранка называць не стала.
«Я наведвала яго, і магу сказаць, што зараз ён адчувае сябе ўжо лепш. Спадзяюся, што хутка ён зможа вярнуцца ў вялікі спорт», – сказала на той момант першая ракетка свету ў снежні 2012-га.
Аднак галоўным пытаннем было, ці зможа Бубка зноў нармальна хадзіць – з-за вельмі няўдалага падзення была рызыка застацца нават без гэтай магчымасці. Але пасля шасці месяцаў на мыліцах і ўпартых заняткаў з рэабілітолагам у Кіеве Бубка змог устаць на ногі, а ў студзені 2014-га заявіўся ў кваліфікацыю Australian Open. Гэтага не чакалі нават самыя блізкія сябры, сярод якіх быў расiянiн Дзмітрый Турсунаў – будучы трэнер Сабаленка
«Калі гэта адбылося, пытанне было ў тым, выжыве ён ці не. Потым – ці зможа ён хадзіць. А цяпер ён гуляе – гэта надзвычайна», – прызнаваў Турсунаў.
Пасля вяртання на корт Бубка гуляў на прафесійным узроўні яшчэ год, але не ўвайшоў нават у топ-1000 сусветнага рэйтынгу. Рэкордным у яго кар'еры засталося 145-е месца, датаванае лістападам 2011-га.
