Кіраўніца белгімнастыкі пабудавала сабе офіс на беразе Драздоў па праекце айчыма Домрачавай – на адкрыцці дзякавала Лукашэнку
Хрысціла дзяцей Стася, у федэрацыю паклікаў адыёзны лукашыст.
14 жніўня Onliner выпусціў фотарэпартаж пра памяшканні новага бізнес-цэнтру ў Мінску агульнай плошчай сем з лішнім тысяч «квадратаў». Уведзены ў эксплуатацыю ён быў у канцы мінулага года, а месціцца ў прэміяльнай для беларускага рэжыму лакацыі – ля самага берага вадасховішча Дразды. На верхніх паверхах не вельмі высокага будынку нават прадаюць жылыя памяшканні з відам на ваду. Ёсць і адкрытая для наведванняў назіральная пляцоўка з масіўнай лесвіцай на шляху, якая ўжо стала для некаторых фотамесцам пад сацсеткі.
Але галоўная «фішка» – частка будынку, якая выступае на 25 метраў і трымаецца ў паветры дзякуючы архітэктурным разлікам.
Ідэю такога будынку распрацавалі ў італьянскім Мілане, але непасрэдна планіроўку па ёй выконвалі ў Беларусі – пяць архітэктараў на чале з Барысам Школьнікавым. Гэты спецыяліст – другі муж Ларысы Мінінай, маці Дарʼі Домрачавай, то бок айчым вядомай экс-біятланісткі. Школьнікаў у свой час прыдумаў і архітэктуру дому сямʼі на Мінскім моры – разам з Мінінай і братам Домрачавай Мікітам, збіццё якога ў 2020-м сілавікамі Лукашэнкі не выклікала ў былой спартсменкі асаблівых эмоцый. Дарэчы, будынак на беразе Драздоў пачалі ўзводзіць у самы гарачы час беларускіх пратэстаў – у ліпені-жніўні 2020-га.
Ёсць у будынку і прамая сувязь са спортам. Адразу на трох паверхах у ім размясцілася Беларуская асацыяцыя гімнастыкі, якая раней, як і многія іншыя, кватаравала на тэрыторыі САК «Алімпійскі». Першы паверх займае офіс БАГ, другі – медыяпраект федэрацыі для раскруткі сваіх відаў (пра яго поспехі пакуль нічога не вядома), а трэці асацыяцыя будзе здаваць у арэнду.
Зрэшты, нічога дзіўнага ў такім размаху няма. Будынак, які знаходзіцца за два крокі ад палаца гімнастыкі, пабудавала кампанія Алены Скрыпель – прадпрымальніцы, якая ўжо амаль дзесяцігоддзе ўзначальвае БАГ. Афіцыйны пераезд офісу арганізацыі адбыўся яшчэ 19 траўня. У прысутнасці «красы» рэжымнага спорту пафасную чырвоную стужку перарэзаў кіраўнік рэжымнага алімпійскага камітэту Віктар Лукашэнка, які заадно ўручыў Скрыпель «ганаровую грамату». Алена ж перадала падарунак Аляксандру Лукашэнку, назваўшы яго «чалавекам, без якога гэты праект наўрад ці мог адбыцца».
Пра біяграфію Скрыпель вядома не так шмат – нават год яе нараджэння не знайсці. Жанчына расказвала, што да 1992 года была начальнікам валютнага ўпраўлення яшчэ прыватнага «Беларусбанка», адкуль пайшла ва ўласны бізнес, таму што «жыццё прымусіла», а кампанію Helen&Valery назвала ў гонар сына, якім была цяжарная. Аднак заадно Алена згадвала, што «рэгістраваць кампанію адправіў бацька сына» – а ў адной з крыніц сцвярджаецца, што Helen&Valery узнік у межах холдынгу вядомага ў 1990-х прадпрымальніка-прадзюсара Валерыя Мацулевіча, які пазней трапіў пад хвалю рэжымных пасадак бізнесменаў. Яшчэ Скрыпель казала, што ў 1996-м пазнаёмілася з Аляксандрам Лукашэнкам на мерапрыемстве, у арганізацыі якога прымала ўдзел, і яму «спадабаўся праект» – і дадала, што ў Лукашэнкі, маўляў, «выдатная памяць».
Ці гэта дапамагло Скрыпель ці нешта яшчэ, але, заняўшыся ўладкаваннем крам дʼюці-фры, жанчына стала буйным гульцом на гэтым рынку. І ўсё было добра да 2007-га – у канцы таго года Лукашэнка загадаў усе такія крамы ў Беларусі забараніць, заявіўшы, што «на іх базе быў арганізаваны крымінальны бізнес» па перапродажы алкаголю ў абыход дзяржпошлін. У Скрыпель узніклі вялікія фінансавыя праблемы, яна публічна крытыкавала забарону – але асабіста да Лукашэнкі ніякіх прэтэнзій не мела, кажучы пра нейкіх «чыноўнікаў, якія робяць [Лукашэнку] прапановы». У 2012-м дʼюці-фры зноў дазволілі – але толькі з вылучэннем 10% выручкі ў дзяржбюджэт і строга зацверджанаму спісу кампаній. Скрыпель змагла туды прабіцца, нейкім чынам зрабіўшы Helen&Valery саўладальнікам спецыяльнай кампаніі ўправы справамі Лукашэнкі. У партнёрстве з рэжымнай структурай Алена гандлюе да гэтага часу.
Па жыцці Скрыпель нярэдка перасякалася з беларускімі «мастачкамі» – Яўгеніі Паўлінай дапамагала са школай, а Валерыі Курыльскай здала памяшканне для вяселля, і гэтае знаёмства ў выніку стала настолькі блізкім, што Скрыпель выступіла хроснай маці дзяцей былой гімнасткі і хакеіста Андрэя Стася.
А ў 2014-м невядомая ў спорце бізнесвумэн стала кіраўніцай Беларускай асацыяцыі гімнастыкі (а яе шматгадовая бізнес-партнёр Рыта Брыцікава – першым намеснікам). Гэта было тыповае па рэжымнай логіцы прызначэнне на фармальна выбарчую пасаду – на Скрыпель выйшаў блізкі да Лукашэнкі чыноўнік Максім Рыжанкоў (сёння кіраўнік белбаскетбола) і прапанаваў узначаліць федэрацыю «жаночага віду спорту». Алена шчыра расказвала, што ўвогуле не мела ўяўлення пра структуру асацыяцыі – а Рыжанкова гэта ні кроплі не бянтэжыла.
- Адказала [Рыжанкову] згодай, а потым зайшла на сайт асацыяцыі і ўбачыла, што ў яе, аказваецца, уваходзіць не толькі мастацкая гімнастыка, але яшчэ і скачкі на батуце, акрабатыка, спартыўная гімнастыка, аэробіка. Пры сустрэчы з Рыжанковым кажу: «Дык у асацыяцыі пяць відаў спорту!». Ён: «Не страшна, дапаможам». Вось і ўся гісторыя, – прызнавалася Скрыпель.
Што ж, галоўным аказалася тое, што сумесная з управай справамі Лукашэнкі кампанія Алены стала генеральным партнёрам асацыяцыі (а яшчэ адна фірма жанчыны – проста партнёрам). Невядомыя Скрыпель скачкі на батуце сталі адзіным відам, якія на двух апошніх летніх АГ прыносілі залатыя медалі. У «профільнай» мастацкай гімнастыцы ўзнагароды таксама былі – а яшчэ «пры Скрыпель» за прыкладна 27 дзяржаўных мільёнаў долараў (хацелі за прыватныя, але інвестар «зліўся») усё ж пабудавалі Палац гімнастыкі, галоўны ўпор у якім быў на мастацкую гімнастыку. А вось спартыўная гімнастыка, яшчэ адзін падкантрольны асацыяцыі алімпійскі выгляд, як быў пры смерці, так і застаўся.
У 2020-м «мастачкі» ды іншыя гімнасты ў першых шэрагах падпісалі ліст за Лукашэнку – асабіста Скрыпель у спісе не значылася, але знайшла іншыя спосабы выказаць сваю адданасць рэжыму.
Папрацавала на рэжым Скрыпель і ў піяры нядаўніх Гульняў краін СНД – схадзіла для гэтага на дзяржТБ, а іншай рэжымнай крыніцы заявіла, што нібыта «ўзровень арганізацыі [Гульняў] вышэй, чым на Кубках свету і Еўропы». Увогуле, у прадпрымальніцы наўрад ці ўзнікнуць праблемы з прадаўжэннем арэнды дзяржзямлі пад свежым бізнес-комплексам, якую ў свой час выдалі толькі да канца 2023 года.
