Сёння ў футболе дакладна ёсць тыя, каму значна больш балюча, чым беларусам. І іх зборныя не патрапілі на Еўра, але ёсць нюанс
Пакуль мы не горшыя за суседзяў.
Калі беларусы праз футбол даўно ўжо маюць тупы хранічны боль, які выклікае толькі прыступы жартаў ды кпін, то некаторыя суседзі і некаторыя краіны, над якімі мы яшчэ нядаўна дамінавалі на полі, праходзяць праз больш вострыя фазы. Не таму, што іх каманды гуляюць кепска, а наадварот – гэтыя зборныя да апошняга моманту дарылі спадзеў, але вялікія мары разбіліся аб жорсткія паразы ў заключным туры еўракваліфікацыі. Прыкладна нам балела ў 2001 годзе, калі Беларусь не дала рады ў адборы на чэмпіянат свету-2002 Украіне і Уэльсу. Хаця хто гэта ўжо помніць?
«Матч стагоддзя» прынёс расчараванне Малдове, але там ганарацца камандай
«Матч стагоддзя» – гэтак у Малдове называлі гульню супраць Чэхіі ў заключным туры кваліфікацыі на Еўра-2024. Каманда Сяргея Клешчанкі да апошняга захоўвала шанцы патрапіць на турнір, але трэба было перамагаць у гасцях.
За тры дні да таго малдаване прымалі ў сябе на стадыёне «Зімбру» лідара групы Е – албанцаў. Пра важнасць гульні для краіны сведчыла тое, што яе наведала прэзідэнтка Малдовы Мая Санду. Яна пабывала ў распранальні каманды, за матчам назірала, такое адчуванне, са звычайнай трыбуны. Вось антуражны ролік з арэны. У ім амаль няма расійскай мовы, як няма і світы вакол Санду. Незвычайна, праўда?
Малдова вырвала нічыю з албанцамі толькі ў канцоўцы. Лік 1:1 на 87-й хвіліне зрабіў паўабаронца «Карпатаў» Уладзіслаў Бабагла. Гэта было вельмі дарэчы перад візітам у Аламоўц, але там усё роўна трэба было перамагаць больш рэйтынгава суперніка, які і сам змагаўся за другое (таксама прахадное) месца ў групе. Чэхі досыць хутка выйшлі наперад, але госці досыць доўга заставаліся ў гульні пры больш-менш роўнай статыстыцы. Надзею яны страцілі пасля таго, як у пачатку другога тайма дзве жоўтыя карткі зарабіў той самы Бабагла. У меншасці малдаване прапусцілі яшчэ двойчы і ў выніку фінішавалі чацвёртымі, перадапошнімі.
Радком вышэй размясціліся палякі – яны таксама не здолелі адабрацца на Еўра праз кваліфікацыю, але яшчэ маюць шанец дзякуючы Лізе нацый.
Тым не менш падставы для гордасці за сваіх у малдаванаў засталіся. Напрыклад, найлепшым снайперам групы з чатырма мячамі ў выніку стаў экс-гулец Салігорска і Віцебска Іон Нікалаеску. І нават Роберт Левандоўскі не здолеў гэтаму перашкодзіць. Праўда, на фінішы адбору Нікалаеску так і не здолей вызначыцца. У аўторак у кішынёўскім аэрапорце людзі збіраліся сустракаць каманду. Хоць кампанія скончылася няўдачай, але нагода падтрымліваць сваіх нікуды не знікла.
Украіна яшчэ можа патрапіць на Еўра, як і Польшча
Увогуле, пакуль сітуацыя такая, хто ніхто з суседзяў беларусаў на чэмпіянат Еўропы не адабраўся. Расія не ўдзельнічала ў кваліфікацыі праз вайну ва Украіне. Латвія безнадзейна стала апошняй у групе D. Літва ў групе G з адной перамогай пакінула ззаду толькі Балгарыю, якая цалкам праваліла турнір (4 нічыі і 4 паразы). Польшча правяла не вельмі моцны год, але ў мінулыя выходныя магла закруціць інтрыгу ў сябе ў групе, перамогшы Чэхію, але не здолела гэтага зрабіць на сваім полі, прычым без асаблівых шанцаў на поспех.
Да апошняга змагаліся ў кваліфікацыі ўкраінцы, але ім для поспеху трэба было абавязкова абгульваць Італію. Ніводная з каманд забіць на «Байарэне» ў Леверкузене, хатняй на сёння для нашых суседзяў, не змагла, а проста цяпер шырока абмяркоўваецца, ці слушна арбітр сустрэчы іспанец Хесус Хіль Мансана не даў пенальці пасля падзення Міхала Мудрыка.
У гэтым адборы ўкраінцы няхай і не надта элегантна, але забралі ўсе пункты ў Мальты і Паўночная Македоніі, а вось фаварытаў – Англію і Італію – ні разу перамагчы не здолелі (па разу прайгралі і па разу згулялі ўнічыю). Італьянцы палепшылі шанцы каманды Сяргея Раброва тым, што ў верасні распісалі 1:1 з македонцамі, але ж пасля яны забралі 4 пункты ў украінцаў. Нашыя суседзі зноў жа захоўваюць шанцы на Еўра – таксама праз дадатковы плэй-оф, што звязаны з Лігай Нацый. Прычым адзін з верагодных на сёння супернікаў – Польшча.
Казахстан прапусціў Славенію
Вялікі спадзеў на панядзелак мелі і казахстанцы. У выпадку гасцявой перамогі над Славеніяй яны гарантавана траплялі на Еўра. Але ж і Славенія трапляла на Еўра, не саступіўшы казахстанцам удома. У выніку гаспадары перамаглі 2:1 – толькі яны вялікі ў ліку ў гэтай гульні.
Але ж і Казахстан мае чорны ход на еўрапейскае першынство – ізноў жа праз дадатковы плэй-оф для ўдзельнікаў Лігі Нацый.
