Вельмі моцныя беларусы збіраюць мільёны праглядаў – у аднаго рэкорды адабраў украінец, іншаму нібыта адмянілі з-за нацыянальнасці
Спаборнічаюць паміж сабой.
У Беларусі хапае асілкаў – людзей, якія паказваюць клас на турніках, са штангай і іншымі варкаўтнымі спосабамі. Праўда, некаторым так хочацца славы, што яны выдумляюць свае дасягненні – і нават паспяваюць кагосьці падмануць.
Але ёсць і людзі адчувальнымi дасягненнямі, рэальнымі дыпломамі ад Кнігі рэкордаў Гінеса і папулярнасцю ў інтэрнэце. Раскажам пра некаторых прыкметных атлетаў.
Аляксей «Шродэр» Клакоцкі
42-гадовы Клакоцкі сам сябе называе «зожнік-фізкультурнік». Ён нарадзіўся і вырас у Бабруйскім раёне Магілёўскай вобласці, яшчэ ў дзяцінстве захапіўся ўзняццем цяжараў, але бацькі хацелі сыну не спартыўнай кар'еры, а чагосьці «больш сур'ёзнага» – таму малады чалавек не паехаў у ВАР, а скончыў школу і паступіў у сельгасакадэмію на эканаміста. Там заняткі спортам не кінуў, браў медалі на лакальных спаборніцтвах па паўэрліфтынгу. Пасля атрымання адукацыі Клакоцкі адслужыў у войску Лукашэнкi і вырашыў, што працаваць хоча па прызванні – для гэтага, ужо не паслухаўшы сваякоў, з'ехаў у Мінск, дзе стаў працаваць персанальным трэнерам у спартзалах.
У 2014-м Клакоцкі стварыў канал на YouTube, для якога прыдумаў мянушку Шродэр – з амерыканскага слэнгу гэта можна перавесці як «качок». Аляксей адразу схапіў добрую для праглядаў тэму – назваў сябе «натуралам», гэта значыць супрацьпаставіў сябе «хімікам», якія дапускаюць прыём забароненых у прафесійным спорце анаболікаў. Адно з першых відэа Клакоцкага з крытыкай бодзібілдараў «на рэчывах» набрала да цяперашняга дня больш за 700 тысяч праглядаў.
Праз некаторы час Шродэра заўважылі ў рускамоўным сегменце ў YouTube, ён пачаў удзельнічаць у розных чэленджах з іншымі спартоўцамі, якія было прынята зваць «зарубамі». У 2016-м яшчэ больш прасунула Клакоцкага падобная да пастановачнай гісторыя, у якой спачатку выпусцілі відэа з абвінавачваннямі ў яго адрас ва ўжыванні «хіміі», потым праверкі на дэтэктары хлусні, які паказаў «сумневы» пры адказах на пытанні наконт допінгу, а затым праходжанне допінг-тэсту, які паказаў чысціню Клакоцкага. Ролікі пра гэта набіралі сотні тысяч праглядаў.
У 2017-м атлет для «далейшага развіцця» (мабыць, сваёй папулярнасці) пераехаў у Маскву, дзе з тых часоў і жыве. У 2018-м больш за 5 мільёнаў праглядаў набрала «бітва» Шродэра, якога ўжо прадстаўлялі як масквіча, са значна маладзейшым піцерцам Віктарам Блудам. «Паласа перашкод» складалася з 20 выхадаў сілай, 20 рыўкоў гіры ў 32 кг, 20 прысяданняў са штангай у 90 кг, 20 адцісканняў на брусах з ланцугом у 20 кг і 20 станавых цяг штангі ў 60 кг. 37-гадовы і 100-кілаграмовы Клакоцкі прайграў, але запомніўся асаблівай тэхнікай рук пры прысяданнях і тым, што давёў справу да канца, ужо разумеючы сваю паразу.
Шродэра называюць універсалам – у яго ёсць спіс дасягненняў у самых розных практыкаваннях з уцяжарвальнікамі і без. У пачатку 2023-га ён, напрыклад, абнавіў свой рэкорд у станавой цязе з гірамі да 272,5 кг. Праўда, працягваюць прылятаць абвінавачанні ў допінгу – у 2022-м Клакоцкі публічна здаў аналізы на некаторыя паказчыкі, якія, як даказваюць у каментарыях, з «натуральным» стылем былі б у зусім іншых лiчбах.
Цяпер на канале Клакоцкага 425 тысяч падпісчыкаў і сумарна больш за 120 мільёнаў праглядаў. Бываюць паспяховыя і відэа з ім на іншых каналах – той жа Блуд двума ролікамі з Клакоцкім у 2022-м набраў 900 тысяч праглядаў. А ў свежых роліках Шродэр у родным аграгарадку Гарбацэвічы ладзіў «чэленджы» у тым ліку з наступным персанажам нашага спісу.
Яўген Лось
33-гадовы Лось – зямляк Клакоцкага, нарадзіўся ў самім Бабруйску. Турнікамі ён захапіўся ў дзяцінстве, але ў прафесійны спорт не пайшоў – паступіў у мясцовы каледж, пасля якога пару гадоў працаваў электрамантажнікам на будоўлі, але заставацца там на ўсё жыццё не захацеў. У выніку хлопец завочна паступіў на факультэт фізвыхавання ў мінскі педуніверсітэт, а працу знайшоў пажарным у бабруйскім гаррайаддзеле МНС Лукашэнкі.
Свой YouTube-канал пад назвай «Дзікі Лось» Яўген завёў яшчэ ў 2011-м, але стабільна абнаўляць пачаў з 2017-га. Паказваў Лось не толькі свае дасягненні, але і шырокадаступныя практыкаванні для прывядзення сябе ў форму не самымі спартыўнымі людзьмі. Менавіта такія відэа прынеслі каналу поспех – ролікі з назвамі тыпу «Прыбраць жывот за 3 хвіліны ў дзень» набіралі па некалькі мільёнаў праглядаў. Цяпер на канале «Дзікі Лось» амаль 3 мільёны падпісчыкаў і сумарна 376 з лішкам мільёнаў праглядаў.
У 2018-м Лось зразумеў, што можа патрапіць у Кнігу рэкордаў Гінеса – там хапае катэгорый. Атлет ацаніў іх, абраў адцісканні на брусах з 18,2-кілаграмовым заплечнікам за хвіліну – і ў ліпені 2018-га было аформлена дасягненне ў 67 разоў. Ну а ў канцы снежня таго ж года ў аналагічнай катэгорыі з 27,2-кг заплечнікам адціснуўся 53 разы за хвіліну і забраў яшчэ адзін рэкорд (абодва выпадкi памятае сайт Кнігі, усё сапраўды). Праўда, цяпер абодва паказчыкі ўжо перакрытыя – рэкорды ўтрымлівае ўкраінец Аляксандр Літвін.
Наконт «хіміі» асаблівых прэтэнзій Лосю не прылятала – яго мышачная маса шмат гадоў застаецца прыкладна на адным узроўні (Яўген важыць каля 73 кг пры росце 175 см). Сам атлет заяўляе, што «забаронку» не ўжывае, але не заракаецца ад падобнага ў будучыні, калі перастане спраўляцца. Акрамя паказу практыкаванняў, папулярны кантэнт на канале асілка – выкананне комплексаў практыкаванняў на час. Не мяняўся графік выхаду відэа нават у самыя яркія дні народнага пратэсту жніўня 2020-га – у гэты час Лось праходзіў чарговы чэлендж з яшчэ адным бабруйскім асілкам Мікітам Юркаўцом, не настолькі папулярным у інтэрнэце.
Максім Труханавец
34-гадовы атлет родам з Давыд-Гарадка. У дзяцінстве ён займаўся футболам і каратэ, але больш спадабаліся практыкаванні на турніку, які ля дома павесіў бацька. Праца на вуліцы, без залы, у выніку стала гэткай фішкай. Пасля школы атлет скончыў Маскоўскі тэхнічны ўніверсітэт імя Баўмана, пасля гэтага пайшоў працаваць у IT і цяпер называе сябе «звычайным праграмістам, які крыху сябруе са спортам». Забароненыя рэчывы атлет адхiляе – кажа, што не бачыць сэнсу шкодзіць здароўю з-за таго, на чым ён нават не зарабляе.
Яшчэ 10 гадоў таму Труханавец задумаўся пра тое, каб трапіць у Кнігу рэкордаў Гінеса. Гэта не адразу, але ўдалося – у любімых для Труханаўца выхадах сілай. Паводле сайта кнігі, яму належылі рэкорды па колькасці паўтораў запар на брусах і кольцах. А ў самым пачатку 2022 года Труханавец падцягваўся ў Мінску на кольцах на цягавітасць – за гадзіну зрабіў 305 паўтораў. Гэты рэкорд застаецца за Максімам да гэтага часу.
Найбольш папулярны Труханавец у Instagram – больш за 400 тысяч падпісчыкаў. На YouTube зараз 170 тысяч падпісчыкаў і сумарна амаль 35 мільёнаў праглядаў. У 2019-м блізкі да адзінаборстваў беларускі комік Вадзім Галыгін параіў прыцягнуць атлета да эстафеты агню Еўрагульняў-2019 у Мінску. Труханавец пагадзіўся, але потым казаў, што на турнір арганізатары выдаткавалі «занадта шмат рэсурсаў – перакрывалі дарогі, вуліцы ў гарадах, высялялі студэнтаў з інтэрнатаў».
З вясны 2023-га Труханавец пачаў выкладваць пасты з геалакацыяй нямецкага Мюнхена (адкуль нават дыстанцыйна далучаўся да «вясковага» чэленджу Шродэра і Лося). А ў ліпені паскардзіўся на «несправядлівасць» ад Кнігі рэкордаў Гінэса – маўляў, спачатку залічылі новы рэкорд па выхадах сілай запар, а потым адмянілі сваё рашэнне. На сертыфікаце, які, як сказаў атлет, яму паспелі выдаць, бачная колькасць 51 (згодна з сайтам кнігі, зараз рэкорднымі лічацца 45 паўтораў), а сам Труханавец пазначаны як прадстаўнік Германіі.
Аднак рэкорд быў ануляваны, паводле Максіма, з-за яго нацыянальнасці. Адзначым, што ў 2022-м Кніга рэкордаў Гінэса сапраўды паведамляла, што «на нявызначаны тэрмін» спыняе фіксаваць рэкорды грамадзян Расіі і Беларусі. Відавочна, гэта наступства вайны, якую з 24 лютага 2022 г. працягвае Расiя ва Украіне з выкарыстаннем тэрыторыі Беларусі.