Нікіфарэнка пра гол у вароты БАТЭ: «Здавалася, Кудравец выставіць рукі і спрацуе ў паветры, аднак усё скончылася інакш, удала для мінскага «Дынама»

Паўабаронца мінскага «Дынама» Алег Нікіфарэнка падзяліўся меркаваннем пра матч з БАТЭ (3:1) у 4-м туры вышэйшай лігі.

– Для мяне гэта першае ў кар'еры класіка – і матч атрымаўся цалкам адпаведным свайму статусу. Шыкоўны антураж, неверагодны градус напалу са стартавага свістка да фінальнага, на трыбунах шмат балельшчыкаў, у тым ліку дынамаўскіх, якіх хочацца падзякаваць за падтрымку.

Не дзелім сапернікаў па рангу, да кожнага рыхтуемся з максімальнай сур'ёзнасцю, настройваемся на сто працэнтаў, але нельга не прызнаць: перамога над такой камандай, як БАТЭ, прыносіць асаблівае задавальненне.

У першым тайме мы дзейнічалі недастаткова востра: не стваралі момантаў, не наносілі ўдараў. У перапынку Вадзім Віктаравіч папрасіў дадаць у агрэсіі наперадзе, больш прэсінгаваць, пагражаць браме.

Добры, відовішчны футбол пачаўся пасля рэалізаванага Арцёмам Быкавым пенальці. Гульня раскрылася, пайшла на сустрэчных курсах. Мы прапусцілі ў даволі крыўднай сітуацыі, на шчасце, хутка зноў павялі.

У тым эпізодзе разам з Валодзем Хвашчынскім пабеглі змагацца за мяч, пушчаны свечкай над штрафной. Здавалася, Кудравец выставіць рукі і спрацуе ў паветры, аднак усё скончылася інакш, удала для нас. Дарэчы, перш галавой не забіваў. Плюс гэта мой першы гол у сезоне, гэтак значны паядынак – эмоцыі зашкальвалі.

За самым напружаным адрэзкам супрацьстаяння я назіраў ужо з лаўкі запасных. Прыйшлося сур'ёзна панервавацца. Дзякуй Фэдзе Лапавухаву, які па-сапраўднаму выратаваў некалькі разоў. А затым Улад Марозаў зняў пытанні.

У Барысаве было выдаткавана вельмі шмат сіл – і фізічных, і псіхалагічных. Цяпер важна хутка аднавіцца. Перакананы, працягнем выходзіць на поле з патрэбнымі матывацыяй, канцэнтрацыяй – і пастараемся дасягаць максімальнага выніку, – сказаў Нікіфарэнка.