Беларус выйграў у покер амаль 4 млн долараў: заўзеў за зборную ў футболе, сам здзівіўся свайму поспеху
Удала зганяў на Багамскія выспы.
У мінулую пятніцу беларус Аляксандр Шылко выйграў прэстыжны турнір 2023 года PokerStars Players No-Limit Hold'em Championship па безлімітным холдэме (самая папулярная разнавіднасць покера). Івэнт з агульнай колькасцю ўдзельнікаў у 1014 чалавек праходзіў у сталіцы Багамскіх астравоў Насаў. Агульны прызавы фонд спаборніцтва склаў амаль 25 мільёнаў долараў. Шылко, які да старту турніру займаў 632-е месца ў глабальным рэйтынгу, дастаўся галоўны прыз у 3 121 838 долараў. Адзначым, што заявачны ўнёсак на PokerStars складаў 25 тысяч долараў.
У вырашальным супрацьстаянні беларус аказаўся мацнейшым за немца Макса Мензеля, які атрымаў прызавых на 262 тысячы долараў менш. Па прызнанні Аляксандра, ён не быў гатовы да такога поспеху і да гэтага часу не верыць, што яму ўдалося перамагчы на турніры ўзроўню PokerStars.
«Шчыра кажучы, я не адчуваю так шмат эмоцый, таму што я вельмі хацеў перамагчы і быў занадта засяроджаны. Я быў занадта засяроджаны, і таму, калі вы бачылі толькі адзін all-in, я быў вельмі эмацыйны, таму што гэта было важна для мяне. Але другі all-in я не глядзеў на стол. Я стараўся быць спакойным наколькі мог», – распавядаў Шылко пра свой поспех. Каб супернікі не маглі поўнасцю счытваць эмоцыі беларуса падчас гульні, той сядзеў за сталом у чорных акулярах, што не забаронена правіламі.
На Багамы Шылко прыляцеў без сваёй сям'і, якая знаходзіцца ў Беларусі і Чэхіі, аднак без падтрымкі не застаўся.
«Тут шмат маіх сяброў. Большасць з іх ужо сышлі. Мяне падтрымліваюць сотні людзей. З большага гэта людзі з рускамоўнай покернай супольнасці, шмат украінцаў і беларусаў», - падзяліўся Шылко.
Што вядома пра Шылко
Цяпер Аляксандру 26. Ён нарадзіўся і вырас у Мінску, дзе пасля школы паступіў у БДУІР. Хлопец вёў лад жыцця звычайнага студэнта. Часам гуляў у міні-футбол з сябрамі.
І ездзіў на «Барысаў-Арэну», дзе ўпершыню пабываў у 2015-м на матчы Беларусь - Іспанія.
Жыццё Шылко змяніла захапленне покерам, у які мінчанін гуляе з 20 гадоў. Там Аляксандр адразу пачаў рабіць поспехі. У 2016-м, яшчэ студэнтам БДУІР, упершыню выйграў прызавых на суму больш за 10 тысяч долараў - 11 834 долары пакерысту выплацілі за другое месца на Belarus Poker Tour у Мінску. З таго часу Шылко на роднай зямлі гуляў усяго тройчы, перайшоўшы на міжнародны ўзровень.
У асноўным беларус выступае ў Чэхіі, куды пераехаў пасля сканчэння ўніверсітэта. Цікава, што да трыўмфу на Багамскіх выспах у кар'еры Шылко было ўсяго восем турніраў, дзе яго прызавыя складалі больш за 10 тысяч долараў. Самы буйных з іх здарыўся ў чэшскім Развадаве ў верасні 2021-га. Там на World Series of Poker Circuit пакерыст зарабіў амаль 107 тысяч долараў. У тым жа горадзе, але ўжо на турнірах іншых серый, Шылко ўдалося яшчэ атрымаць 86 і 80 тысяч долараў. Апошні ганарар Аляксандру дастаўся за адзіную перамогу ў кар'еры на турніры да PokerStars - гэта здарылася ў траўні мінулага года на серыі Eureka Poker Tour.
Агульная сума заробленых грошай да мінулага тыдня ў Шылко складала 423 тысячы долараў. Аднак не варта думаць, што ўся сума сыходзіла беларусу. Па-першае, неабходна ўлічваць, што ў кожным турніры ўдзельнік плаціць уступны ўзнос. Часам здараецца так, што сумы за ўдзел гульца ў спаборніцтвах перавышаюць агульны аб'ём атрыманых прызавых. Па-другое, у свеце покера дастаткова інвестараў, якія ўкладваюць уласныя сродкі ў падрыхтоўку і прасоўванне гульцоў, а затым забіраюць свой працэнт прызавых.
Ёсць беларусы круцейшыя за Шылко
У глабальным рэйтынгу пакерыстаў два беларусы апярэджваюць Шылко. На 26-м радку знаходзіцца Мікіта Бадзякоўскі. За сваю кар'еру ўраджэнец Мазыра выйграў больш за 37 мільёнаў долараў. Пакуль самая апошняя перамога Бадзякоўскага адбылася ў жніўні мінулага гады. Тады Мікіта аказаўся лепшым за ўсіх на барселонскім EPT Super High Roller, дзе яму выпісалі чэк амаль на 2 мільёны долараў. На ўзнагароджанне беларус выйшаў з украінскім сцягам.
396-е месца ў глабальным рэйтынгу займае Сяргей Чудапал. Пакерыст не такі вядомы ў сусветным покеры, гуляючы ў асноўным на турнірах у Сочы і на Кіпры. У кастрычніку 2021-га беларус быў побач з топ-100, аднак да ўваходжання туды яму не хапіла двух радкоў. З таго часу Чудапал паступова падае ў рэйтынгу. Усяго за кар'еру Сяргей атрымаў прызавых на 732 тысячы долараў.