Кіраўнік Федэрацыі бабслея і скелетона Украіны Гераскевіч: «У рашэнні ўрада ўбачыў бяссілле вышэйшага кіраўніцтва дзяржавы, Мінспорту і НАК»

Кіраўнік Федэрацыі бабслея і скелетона Украіны Міхаіл Гераскевіч падзяліўся думкамі пра загад аб забароне дэлегацыям украінскіх зборных удзельнічаць у спаборніцтвах, да якіх дапушчаныя расіяне і беларусы.

«Я ў гэтым рашэнні ўрада ўбачыў, як бы так карэктна выказацца… Бяссілле вышэйшага кіраўніцтва дзяржавы, Міністэрства спорту і Нацыянальнага алімпійскага камітэта (НАК). Бяссілле, перш за ўсё, перад трагедыяй для ўкраінскага спорту, якую здзяйсняе Міжнародны алімпійскі камітэт (МАК).

Наша дзяржава не знайшла нічога іншага, як не проста аб'явіць байкот, а яго ўзаконіць і зрабіць яго прымусовым. Тады, калі немагчыма і зусім бязглузда сёння байкатаваць.

У пачатку сакавіка адбылося пасяджэнне з удзелам НАК, Міністэрства моладзі і спорту і прэзідэнтаў федэрацый розных відаў спорту. На гэтым паседжанні міністр моладзі і спорту Вадзім Гутцайт вельмі настойваў, каб мы ўсе, прэзідэнты федэрацый падпісаліся пад агульным байкотам. Паважаны мной Валерый Барзоў, які прысутнічаў і з'яўляецца членам МАК, растлумачыў, што байкот абсалютна немэтазгодны, сёння ён не прынясе ніякай карысці для Украіны і ніякай шкоды для МАК.

Аб'ява байкоту можа быць мэтазгодна, калі да Алімпійскіх гульняў будзе заставацца паўгода. Менавіта за паўгода да спаборніцтваў украінскі НАК, як правіла, паведамляе пра згоду ўдзелу ў Алімпіядзе. Дык вось, калі будзе час за паўгода да Гульняў, НАК можа паставіць МАК перад фактам, што мы байкатуем удзел у Алімпіядзе з-за прысутнасці там рускіх.

Вось у гэтым выпадку гэта будзе прэцэдэнтам і яно прынясе жахлівыя страты для Міжнароднага алімпійскага камітэта. Ён жа змушаны будзе плаціць вельмі сур'ёзныя штрафы сусветным медыя, якія выкупілі тэлевізійныя правы на паказ, бо Ўкраіны тамака не будзе. Таксама будуць вялікія страты з-за лагістыкі, бо на той момант ужо будзе заказ транспарту для абслугоўвання спаборніцтваў, зарэзервавана жыллё, заказ харчавання, праца валанцёраў і г.д. Усё гэта пацягне за сабой вельмі сур'ёзны фінансавы ціск на МАК. Вось чаму байкот менавіта сёння – гэта нелагічна.

Ёсць і іншы аспект – інфармацыйны. Калі ўрад у асобе міністра Гутцайта аб'яўляе байкот, ссоўваюцца акцэнты ўвагі свету з барацьбы, з супрацьпраўнымі дзеяннямі МАК на тое, якія ўкраінскія дзеянні. А нашая пазіцыя выглядае не барацьбой за тое, каб свет байкатаваў расіян, мы самі садзімся з белым сцягам», — сказаў Гераскевіч.

Нагадаем, 31 сакавіка ўрад Украіны забараніў сваім спартсменам удзельнічаць у адборачных стартах на Алімпіяду-2024, калі там прадстаўлены атлеты з Беларусі і Расіі.