«У мяне заканчваюцца сілы». Клоп сыдзе з «Ліверпуля» ў канцы сезону – адразу ж патлумачыў рашэнне

Галоўная нечаканасць дня, калі не тыдня/месяца/усяго сезона ў АПЛ – Юрген Клоп абвясціў, што пакіне пасаду галоўнага трэнера «Ліверпуля» ў канцы бягучай кампаніі.

🔴 Немец даў разгорнутае эмацыйнае інтэрв'ю, у якім патлумачыў рашэнне.

Самае галоўнае адтуль:

«Я пакіну клуб у канцы сезону. Я разумею, што гэта шок для многіх у той момант, калі вы чуеце гэта ў першы раз, але, відавочна, я магу гэта растлумачыць – ці, прынамсі, паспрабаваць растлумачыць. Я люблю абсалютна ўсё ў гэтым клубе, я люблю ўсё ў гэтым горадзе, я люблю ўсё ў нашых заўзятарах, я люблю каманду, люблю персанал. Я люблю ўсё.

Але тое, што я ўсё яшчэ прымаю гэтае рашэнне, паказвае, што я перакананы – я павінен яго прыняць. У мяне заканчваюцца сілы. Я даўно ведаў, што мне давядзецца абвясціць пра гэта ў нейкі момант. Ведаю, што не магу выконваць гэтую працу зноў і зноў, зноў і зноў. Але я здаровы, наколькі можна быць у маім узросце...»

«... Вядома, мінулы сезон быў вельмі цяжкім, і былі моманты, калі ў іншых клубах, верагодна, рашэнне было б такім: «Давай, вялікі дзякуй за ўсё, але, магчыма, мы павінны расстацца». Тут гэтага не адбылося. Для мяне было супер-супер-суперважна дапамагчы вярнуць гэтую каманду на рэйкі. Гэта было ўсё, пра што я думаў...»

«... У ідэальным свеце я б нікому нічога не сказаў пра гэта да канца сезона, выйграў бы ўсё, а потым развітаўся. Гэта немагчыма. У свеце, у якім мы жывем, немагчыма трымаць такія рэчы ў сакрэце. Магчыма, гэта сюрпрыз, што мы змаглі захаваць гэта да гэтага часу ў сакрэце. Людзі з майго штаба павінны ведаць загадзя – і асабліва клуб павінен усё ведаць загадзя і павінен усё планаваць. На працягу многіх гадоў мая роля была шмат у чым дамінуючай. Гэта было не наўмысна, але так адбылося...»

«... Гэта ўжо трэці раз, калі я павінен рабіць нешта падобнае (сысці з клуба – заўв.), і я вельмі гэтага не хачу. Але ў рэшце рэшт я павінен гэта зрабіць, таму што я сапраўды перакананы ў адным: калі вам трэба прыняць такое рашэнне, лепш зрабіць гэта крыху раней, чым позна...»

«... Калі вы паглядзіце на маю кар'еру, то я б сказаў, што яна нерэальная. Прыйсці адтуль, адкуль я родам, і скончыць трэнерам у «Ліверпулі» – гэта казка, якую вельмі цяжка ўявіць...»

«...Калі вы спытаеце мяне: «Ці будзеце вы калі-небудзь ізноў працаваць трэнерам?», то цяпер я адказаў бы: «Не». Але я дакладна не ведаю, як усё будзе адчувацца, бо я ніколі не быў у такой сітуацыі. Толькі ведаю дакладна, што ніколі не буду кіраваць ніводным іншым клубам у Англіі, акрамя «Ліверпуля», гэта 100%. Гэта немагчыма...»

«... Калі б вы папрасілі маю малодшую версію ўзначаліць гэтую каманду 10 гадоў таму, я б прабег праз цагляную сцяну, каб зрабіць гэта. На жаль, я выконваў гэтую працу 24 гады. Мне трэба паглядзець, як складваецца жыццё... як жывецца, насамрэч...»

«... Мы – «Ліверпуль», мы разам прайшлі праз больш складаныя рэчы. Давайце выціснем усё з гэтага сезону і атрымаем яшчэ адну рэч, праз якую можна ўсміхнуцца, азіраючыся назад у будучыню. Дзякуй».

🔴 Клоп узначаліў «Ліверпуль» больш за восем гадоў таму. За гэты час правёў 464 матчы – 288 перамог (60,7%), 96 нічыіх, 80 паразаў, 106 прыцягнутых гульцоў. У АПЛ – 2,12 пункты ў сярэднім за гульню.

А самае галоўнае – вярнуў клубу тытулы, за што атрымаў і індывідуальныя ўзнагароды. Па трафеях, дарэчы, ідэальны баланс – па адным на кожны турнір.

🔴 З Клопам «Ліверпуль»:

– упершыню з 1990-га выйграў чэмпіянат Англіі;

– упершыню з 2005-га выйграў Лігу чэмпіёнаў;

– упершыню з 2006-га выйграў Кубак Англіі;

– упершыню з 2012-га выйграў Кубак Лігі;

– тройчы выйшаў у фінал Лігі чэмпіёнаў;

– у кожным з сямі поўных сезонаў Юргена фінішаваў у топ-5 – на момант яго прызначэння быў толькі адзін такі выпадак за шэсць гадоў.

***

Каго бачыце пераемнікам для Клопа?

Фота: ФК «Ліверпуль»